Daimi Nümayəndəlik BMT-nin İllik Bazarında iştirak etmişdir
Azərbaycan Respublikasının Cenevrə şəhərində BMT bölməsi və digər beynəlxalq təşkilatlar yanında Daimi Nümayəndəliyi BMT tərəfindən təşkil edilmiş “İllik Bazar”da iştirak etmişdir.
Hər il ənənəvi olaraq BMT-nin Cenevrə şəhərindəki bölməsi – Millətlər Sarayında təşkil olunan “İllik Bazar”ın keçirilməsində məqsəd, ölkələr tərəfindən onların mədəniyyəti, incəsənəti, mətbəxi və adət-ənənələrinin təbliğ edilməsindən və dünyanın müxtəlif bölgələrində yaşayan uşaqlara yardım üçün təsis olunmuş xeyriyyə fonduna töhfələrin edilməsindən ibarət olmuşdur.
Cari ildə “İllik Bazar”ın 40-cı ildönümünün qeyd olunduğunu nəzərə alaraq, sözügedən tədbir “Sevginin 40 ili” şüarı altında təşkil edilmişdir. Tədbirdə Cenevrədəki Daimi Nümayəndələri, BMT-nin Cenevrə Bölməsinin rəhbəri K-C.Tokayev, Cenevrə kantonunun və şəhərinin rəhbərləri, diplomatlar, İsveçrə ictimaiyyəti, İsveçrədə akkreditə olunmuş beynəlxalq təşkilatların nümayəndələri və digər şəxslər iştirak etmişlər.
Daimi Nümayəndəliyimizin ənənəvi olaraq iştirak etdiyi “İllik Bazar”da ölkəmizin sərgi stenddə milli mədəniyyətimizi, maddi-mənəvi irsimizi, incəsənətimizi və adət-ənənələrimizi əks etdirən əşyalar nümayiş olunmuş, eyni zamanda Azərbaycanın turizm potensialı, mədəniyyəti və incəsənətinə dair kitab, jurnallar və xəritələr, eləcə də digər vəsaitlər iştirakçılara paylanılmışdır.
Tədbirin humanitar səciyyə daşıdığına baxmayaraq, “İllik Bazar”da iştirak edən Ermənistanın Daimi Nümayəndəliyinin stendində Azərbaycanın Dağlıq Qarabağ bölgəsi, eləcə də Şuşa şəhəri ilə bağlı erməni müəllifləri tərəfindən hazırlanmış vəsaitlərin nümayiş etdirilməsinə cəhd göstərilmişdir. Həmin vəsaitlərdə Azərbaycanın ərazi bütövlüyü təhrif edilmiş və ölkəmizin ərazisi ilə bağlı həqiqəti əks etdirməyən xəritələr verilmişdir.
Bu xüsusda, Səfir, Daimi Nümayəndə Murad Nəcəfbəyli hələ tədbirin rəsmi açılış mərasimindən öncə sözügedən məsələ haqqında “İllik Bazar”ın təşkilatçılarını məlumatlandırmış və ölkəmizin ərazi bütövlüyünü təhrif edən, özündə həqiqəti əks etdirməyən, siyasi məqamları ehtiva edən xəritə və nəşrlərin Ermənistanın stendindən çıxarılması tələb olunmuşdur. Azərbaycan tərəfinin tələbindən sonra BMT nümayəndələri Ermənistanın stendinə baxış keçirmiş və Ermənistanın Daimi Nümayəndəliyindən sözügedən materialların nümayişinin dərhal dayandırılmasını tələb etmişlər. Bundan sonra həmin materiallar Ermənistanın stendindən çıxarılmışdır. BMT-nin nümayəndələri bu xoşagəlməz hal barədə onların məlumatlandırıldığına görə Azərbaycan tərəfinə öz dərin təşəkkürünü ifadə etmiş və belə halların bir daha təkrarlanmasına imkan verməyəcəklərini vəd etmişlər.
Tədbirin sonunda Azərbaycan Respublikası Hökuməti adından müvafiq maliyyə vəsaiti BMT-nin aidiyyəti xeyriyyə fonduna köçürülmüşdür. Həmin maliyyə vəsaiti dünyanın müxtəlif yerlərində əlverişsiz şəraitdə olan uşaqların xeyrinə müxtəlif layihələrin həyata keçirilməsi üçün sərf olunacaqdır.
Növbəti “İllik Bazar”ın 2013-cü ilin noyabr ayında keçirilməsi nəzərdə tutulmuşdur.
